മലപ്പുറം വണ്ടൂരിൽ മൂന്ന് പേർക്ക് മലമ്പനി സ്ഥിരീകരിച്ചു Malaria outbreak in Malappuram wandoor as three cases confirmed | Life

ആരോഗ്യ പ്രവർത്തകരുടെ നേതൃത്വത്തിൽ പനി സർവേ, ഉറവിട നശീകരണം, ആരോഗ്യ ബോധവൽക്കരണം തുടങ്ങിയ നടപടികളും പുരോഗമിക്കുന്നു. പ്രതിരോധ പ്രവർത്തനങ്ങൾക്ക് വേണ്ടിയുള്ള ഏകോപനത്തിന്റെ ഭാഗമായി ബ്ലോക്ക് മെഡിക്കൽ ഓഫീസർ തിങ്കളാഴ്ച (സെപ്തംബർ 29) രാവിലെ 8 മണിമുതൽ വണ്ടൂർ താലൂക്ക് ആശുപത്രിയിൽ എല്ലാ ഹെൽത്ത് ഇൻസ്പെക്ടർമാരെയും ജൂനിയർ ഹെൽത്ത് ഇൻസ്പെക്ടർമാരെയും നിയോഗിച്ചു. ആശ പ്രവർത്തകരെയും സന്നദ്ധ പ്രവർത്തകരെയും ഉൾപ്പെടുത്തി ടീമുകളായി തിരിഞ്ഞ് ഇവർ പ്രതിരോധ പ്രവർത്തനങ്ങൾക്ക് നേതൃത്വം നൽകുന്നു.

ഹെൽത്ത് സൂപ്പർവൈസറുടെ നേതൃത്വത്തിൽ പ്രദേശത്തെ വീടുകളിലെ കുടിവെള്ള ടാങ്കുകളും മറ്റു ജലസ്രോതസ്സുകളും പരിശോധിച്ചു വരികയാണ്. കഴിഞ്ഞ രാത്രിയിൽ നടന്ന പരിശോധനയിൽ മലമ്പനി പരത്തുന്ന അനോഫിലിസ് കൊതുകിനെയും അതിന്റെ ലാർവകളെയും കണ്ടെത്തി. പരിസരപ്രദേശങ്ങളിൽ പനി ലക്ഷണങ്ങൾ കണ്ടാൽ ഉടൻ ആരോഗ്യ പ്രവർത്തകരെ അറിയിക്കണമെന്ന് മെഡിക്കൽ ഓഫീസർ നിർദേശിച്ചു.

പ്രതിരോധ പ്രവർത്തനങ്ങളുടെ ഭാഗമായി നോട്ടീസ് വിതരണം, ആരോഗ്യ ബോധവൽക്കരണം തുടങ്ങിയ പ്രവർത്തനങ്ങളും നടന്നു. പ്രവർത്തനങ്ങൾക്ക് വണ്ടൂർ മെഡിക്കൽ ഓഫീസർ ഡോ. ഉമ്മർ പള്ളിയാളി, ഹെൽത്ത് സൂപ്പർവൈസർ ഇൻ ചാർജ് ശ്രീജിത്ത് അമ്പറക്കാട്ട്, ഹെൽത്ത് ഇൻസ്പെക്ടർ ജാൻസി എം.ടി, ജൂനിയർ ഹെൽത്ത് ഇൻസ്പെക്ടർമാരായ എം. പ്രഭാകരൻ, പുഷ്പ കെ.വി, ജസീർ എം.എം, ജിതേഷ് പി. എന്നിവരും വണ്ടൂർ ഹെൽത്ത് ബ്ലോക്കിലെ മറ്റു ആരോഗ്യ പ്രവർത്തകരും നേതൃത്വം നൽകി.

കേരളത്തിൽ വയനാട് പോലെയുള്ള മലമ്പ്രദേശങ്ങളായിരുന്നു പണ്ടുകാലത്ത് മലമ്പനിക്ക് കുപ്രസിദ്ധമായത്. അങ്ങനെയാണ് മലേറിയ മലയാളികൾക്ക് മലമ്പനിയായത്.1965 ൽ കേരളത്തിൽ മലമ്പനി ഉന്മൂലനം ചെയ്തതായി ഔദ്യോഗികമായി പ്രഖ്യാപിക്കപ്പെട്ടു. ഏറെ ആഘോഷിക്കപ്പെട്ട ഈ വിജയം അധികകാലം നീണ്ടുനിന്നില്ല. പിന്നീട് പതുക്കെ പതുക്കെ മലമ്പനി തിരിച്ചു വരാൻ തുടങ്ങി. എന്നാൽ താരതമ്യം ചെയ്യുമ്പോൾ മലമ്പനിയുടെ ശക്തി തീരെ ക്ഷയിച്ചിരുന്നു.